அஷ் ஷெய்க் உபைது அல் ஜாபிரி (ரஹிமஹுல்லாஹ்) அவர்களுக்காக துஆ

எங்கள் அன்பிற்குரிய அஷ்-ஷெய்க் அல்-அல்லாமா உபைது இப்னு அப்துல்லாஹ் இப்னு சுலைமான் அல்-ஹம்தானி அல்-ஜாபிரி (ரஹிமஹுல்லாஹ்) (இறப்பு: 28 ரபீ அல்-ஆஹிர் 1444ஹி). அல்லாஹ் (سبحانه وتعالى) அவருடைய கபுரை வெளிச்சமாகவும் விசாலமாகவும் ஆக்கி வைப்பானாக. அல்லாஹ் சுபஹானஹூதஆலாவிற்கு அடிபணிந்த நிலையில், அவனை பயந்த நிலையில், அவனிடம் மஃக்பிரத்தை தேடிய நிலையில், கல்வி சுமந்த மனிதராக, அஹ்லுஸ் ஸுன்னாஹ்வின் தலைவர்களில் ஒருவராக, நபி (صلى الله عليه وسلم) மற்றும் ஸஹாபாக்களின் (رضي آللهُ عنهم) வழிமுறைக்கு மக்களை அழைத்த ஒரு பரக்கத்தான நிலையில் இந்த துனியாவை பிரிந்தார்கள். இவரிடத்தில் நேரடியாக பயனடைய முடியாத மக்களாக நாம் இருந்தாலும், இவரது பேச்சுக்கள் மற்றும் புத்தகங்களின் மூலமாக கிடைத்த தெளிவுகளும் பலன்களும் ஏராளமாகும். இவர் பல இளைஞர்களை ஹவாரிஜ் என்ற தீவிரப் போக்குடைய கூட்டத்திலிருந்து காப்பாற்றி ஹாரிஜியாக்களின் வழிகெட்ட கொள்கையையும் அதன் தீவிரமான போக்கையும் கல்வி ரீதியாக தெளிவுபடுத்தி ஸலஃபுஸ் ஸாலிஹீன்களின் நேரான பாதையை மக்களுக்கு எடுத்து வைத்து வழிகாட்டினார்கள்.

அஷ்-ஷெய்க் யஹ்யா ஸில்மி அஸ் ஸைலானி அவர்களின் தொடர்பை அல்லாஹ் சுப்ஹானஹூதஆலா எங்களுக்கு ஏற்படுத்தி தந்த பொழுது, ஸலஃபுகளின் கொள்கையையும் வழிமுறையும் கல்வி ரீதியாக எடுத்து வைத்து எங்களுக்கு வழிகாட்டினார்கள். அந்த நேரத்தில் இந்த கொள்கையை சுமந்த சிறப்பிற்குரிய பல அறிஞர் பெருமக்களை எங்களுக்கு அறிமுகம் செய்து வைத்தார்கள். இக்காலகட்டத்தில் அல்லாஹ் சுப்ஹானஹூ வ தஆலா அஷ்-ஷெய்க் உபைது அல் ஜாபிரி (ரஹிமஹுல்லாஹ்) அவர்களின் மாணவர்களையும் எங்களுக்கு காட்டி தந்தான்.

அந்த மாணவர்கள் எடுத்து வைத்த கொள்கை, அவர்களின் நடவடிக்கை அவர்களின் ஒழுக்கங்கள், நபி வழியை வாழ்க்கையாக ஆக்கிக் கொள்ள அவர்கள் காட்டிய ஆர்வம், எங்களை வியப்படைய செய்தது. அஷ்-ஷெய்க் யஹ்யா ஸில்மி அஸ் ஸைலானி அவர்களின் அழைப்புப் பணியிலும், இந்த உலமாக்களின் அழைப்புப் பணியிலும் எவ்வித வேறுபாட்டையும் காண முடியவில்லை. உலகத்தின் வெவ்வேறு பகுதியில் வாழ்ந்தாலும் அஹ்லுஸ் ஸுன்னாஹ்வின் கொள்கையும், குரலும் அழைப்புப் பணியும் ஒன்றாகத்தான் இருக்கும் என்பதை அஷ்-ஷெய்க் யஹ்யா ஸில்மி அஸ் ஸைலானி எங்களுக்கு சொல்லிக் கொண்டே இருந்தார். அந்த வார்த்தை இம்மாணவர்களை கண்ட பொழுது எங்களுக்கு நிரூபனமானது. இந்த ஸாலிஹான மக்களின் அறிமுகம் சத்தியத்தை உறுதியாக பெற்றுக் கொள்வதற்கும் சத்தியவாதிகளை அறிந்து கொள்வதற்கும் பெரும் உதவியாக இருந்தது. கல்வி அறிவு இல்லாத எங்களை போன்ற பொது மக்களுக்கு அது உறுதித் தன்மையை அதிகப்படுத்தியது. அல்ஹம்துலில்லாஹ்.

இந்த மூத்த அறிஞரான அஷ்-ஷெய்க் உபைது அல்-ஜாபிரி (ரஹிமஹுல்லாஹ்) அவர்களுக்கு அல்லாஹ் சுபஹானஹூ வ தஆலா அருளிய ஒரு சிறப்பான துன்யா வாழ்க்கையின் முடிவை போல் நமக்கும் அருள்வானாக. இவரது மாணவர்கள் மற்றும் குடும்பத்தாரை கொண்டு இவருடைய நன்மைகளை மென்மேலும் அல்லாஹ் அதிகரித்துக்கொண்டே இருப்பானாக. ஆமீன்!

அஷ் ஷெய்க் உபைது அல் ஜாபிரி அவர்களுக்காக துஆ