(ஃபஜ்ர் தொழுகைக்குப் பின்னால் நடத்தப்பட்ட) ஸில்ஸிலத்துல் ஆஹாதீஸ் அஸ் ஸஹீஹாவின் அமர்வுகளின் பாடக் குறிப்புகள் தொகுப்பு:

வானங்களிலும் பூமியிலும் உள்ள அல்லாஹ்வின் படைப்புகளை பற்றி சிந்தித்து பயன்பெறுவதன் கடமை

தேதி: 7 ரபி அல் ஆஹிர் 1445/ 22.10.23 | ஹதீஸ் எண்: 68

-------------------------------------------------------------------------------------------------

ஹதீஸின் அர்த்தம்:

நிச்சயமாக, இன்றிரவு வசனங்கள் இறக்கப்பட்டன; அவற்றைப் படித்து அதைப் பற்றி சிந்திக்காதவருக்கு சாபமே: "நிச்சயமாக, வானங்கள், பூமி ஆகியவற்றின் படைப்பிலும்; இரவும், பகலும் மாறி மாறி வருவதிலும் அறிவுடையோருக்கு திடமாக அத்தாட்சிகள் பல இருக்கின்றன". என்ற வசனம் (அருளப்பட்டது)

1. இந்த ஹதீஸ் ஸஹீஹ் இப்னு ஹிப்பானில் நபி ஸல்லல்லாஹு அலைஹி வஸல்லம் அவர்களின் பண்புகள் என்ற தலைப்பின் கீழ் பதிவு செய்யப்பட்டுள்ளது. இமாம் இப்னு ஹிப்பானும் இமாம் அல்பானியும் (ரஹிமஹுமுல்லாஹ்) இதனை ஸஹீஹ் என்று தீர்ப்பளித்துள்ளார்கள்.

2. இந்த ஹதீஸ்

إِنَّ فِى خَلْقِ ٱلسَّمَـٰوَ‌ٰتِ وَٱلْأَرْضِ وَٱخْتِلَـٰفِ ٱلَّيْلِ وَٱلنَّهَارِ لَءَايَـٰتٍ لِّأُو۟لِى ٱلْأَلْبَـٰبِ

என்ற சூரா ஆல இம்ரானின் 190 வது வசனம் வஹியாக இறக்கப்பட்டதை நமக்கு எடுத்துக்காட்டுகிறது.

3. யார் அல்லாஹ்வுடைய படைப்புகளை பற்றி நல்ல முறையில் சிந்தித்து பயன்பெற்று பின் அதனை மறுக்கிறார்களோ அவர்கள் சபிக்கப்பட்டவர்கள்.

4. உம்முல் முஃமினீன், நபி ஸல்லல்லாஹு அலைஹி வஸல்லம் அவர்களின் மனைவி, மேலும் ஆலிமா ஆகிய ஆயிஷா ரலியல்லாஹு அன்ஹா அவர்களின் அன்பு, பாசம், மற்றும் ஒத்துழைப்பை பற்றியும் நாம் இங்கு காண முடியும். ஆயிஷா ரலியல்லாஹு அன்ஹா அவர்கள் ரசூல் ஸல்லல்லாஹு அலைஹி வஸல்லம் அவர்களிடமிருந்து கல்வி பெறுவதற்கு மிக ஆர்வமாக இருந்தார்கள். அந்த கல்வியை கொண்டு நபித்தோழர்களுக்கு வழிகாட்டவும் செய்தார்கள்.

5. இரவுத் தொழுகையில் நிற்பதன் நோக்கம், அல்லாஹ்விடம் சிறம் தாழ்த்தி அவனுடைய மன்னிப்பையும் பொருத்தத்தையும் மட்டும் நாடி வணங்குவதற்காகவே ஆகும். மேலும் தொழுகையில் அழுவதும் அல்லாஹ்வுடைய ஆயத்துகளை பற்றி சிந்திப்பதும் அவனுக்கு நன்றி உள்ள அடியானாக இருப்பதைப் பற்றி எண்ணுவது போன்ற ஸுன்னாஹ்க்களையும் நாம் விளங்க முடியும்.

6. நபி ஸல்லல்லாஹு அலைஹி வஸல்லம் இரவின் முதல் பகுதியில் உறங்கினார்கள் இரவின் இறுதிப் பகுதியில் தொழுகைக்காக நின்றார்கள் என்ற அர்த்தத்தில் பல ஹதீஸ்கள் வந்துள்ளது. எவரெல்லாம் இரவு முழுவதும் தொழுகையில் ஈடுபட முடியும் என்று கருதுகிறார்களோ அவர்களுக்கு இந்த ஹதீஸே மறுப்பாகும். அஷ்-ஷெய்க் அப்துல் ஹை லக்னவி அவருடைய நூல் ஒன்றில் இபாதத்துகளை அதிகப்படுத்துவது பித்அத் ஆகாது என்று நிரூபிக்க இந்த நபி மொழியை ஆதாரமாக காட்டுகிறார். ஆனால் இந்த கருத்து முற்றிலும் தவறானதாகும். இரவின் கடைசி பகுதியில் தொழுவதுதான் நபி ஸல்லல்லாஹு அலைஹி வஸல்லம் அவர்களின் வழக்கமான தொழுகை முறையாக இருந்தது, அதுவே ஆதாரத்துடன் நிரூபிக்கப்பட்ட வழிமுறை ஆகும்.

7. இந்தப் பாடத்திலிருந்து நாம் இமாம் அல்பானி அவர்கள் அஷ்-ஷெய்க் அப்துல் ஹை லக்னவி மீது வைத்துள்ள விமர்சனத்தைக் காண முடியும். அவர் பலவீனமான மற்றும் இட்டுக்கட்டப்பட்ட நபி மொழிகளை அவருடைய கருத்தை முன்னிலைப்படுத்துவதற்காக சரி காண முயற்சி செய்கிறார். இது அவருடைய கல்வியை கையாளும் வழிமுறையில் உள்ள பலவீனத்தை எடுத்துக்காட்டுகிறது. உதாரணமாக "நபித்தோழர்கள் நட்சத்திரங்களை போன்றவர்கள், நபித்தோழர்களில் யாரேனும் ஒருவரை நீங்கள் உங்களுடைய வழிகாட்டியாக எடுத்துக் கொண்டால் நீங்கள் நேர்வழி அடைவீர்கள்" என்ற பலவீனமான ஹதீஸை இவர் ஹஸன் என தீர்ப்பளித்து அதை அவருடைய கருத்திற்கு ஏற்ற ஆதாரமாக முன் வைக்கிறார்.

8. முடிவுரையாக அஷ் ஷேக் யஹ்யா சில்மி அஸ் ஸைலானி கூறினார்கள், அஷ்-ஷெய்க் அப்துல் ஹை லக்னவி அவர்கள் ஹனஃபி மத்ஹபில் பயின்று பின்பு ஹதீஸ் அறிஞர்களின் வழிமுறை ஏற்று மத்ஹபுவாதிகளை எதிர்த்திருந்தாலும், இவருடைய தவறான வழிமுறையை இமாம் அல்பானி அவர்கள் நமக்கு இங்கு எடுத்துக்காட்டுகிறார்கள்.

இரவுத் தொழுகையை பொறுத்தவரை நபி ஸல்லல்லாஹு அலைஹி வஸல்லம் அவர்கள் இரவின் மூன்றாவது பகுதியில்தான் பெரும்பாலான நேரங்களில் தொழுது இருக்கிறார்கள். இரவின் முதல் பகுதியில் உறங்குவார்கள், பின்பு எழுந்து தொழுகைக்கு நிற்ப்பார்கள். இதுதான் நபி ஸல்லல்லாஹு அலைஹி வஸல்லம் அவர்களின் ஸுன்னாஹ்வாகும். இரவு முழுவதும் வணக்கத்தில் நின்றதற்கான எந்த ஒரு ஆதாரமும் இல்லை. மேலும் இரவின் மூன்றாவது பகுதியில் இதர வணக்கங்களாகிய திக்ர் மற்றும் திலாவத் போன்றவைகளில் நபி ஸல்லல்லாஹு அலைஹி வஸல்லம் அவர்கள் ஈடுபடுவார்கள்.

(அஷ்-ஷெய்க் அபு அப்துர் ரஹ்மான் யஹ்யா சில்மி அஸ் ஸைலானி ஹஃபிழஹுல்லாஹ் அவர்கள் நடத்திய ஸில்ஸிலத்துல் ஆஹாதீஸ் அஸ் ஸஹீஹா என்ற நூலில் இருந்து பயனுள்ள குறிப்புகள் - அமர்வு 29)

நூல்: ஸில்ஸிலத்துல் ஆஹாதீஸ் அஸ் ஸஹீஹா

ஆசிரியர்: இமாம் முஹம்மத் நாஸிருத்தின் அல்-அல்பானி (رَحِمَهُ ٱللَّٰهُ)