(ஃபஜ்ர் தொழுகைக்குப் பின்னால் நடத்தப்பட்ட) ஸில்ஸிலத்துல் ஆஹாதீஸ் அஸ் ஸஹீஹாவின் அமர்வுகளின் பாடக் குறிப்புகள் தொகுப்பு:

கெடுதிகளைக் கண்டு தடுப்பவர்களையும், அதை தடுக்காதவர்களையும் பற்றிய எடுத்துக்காட்டு

தேதி: 9 ரபி அல் ஆஹிர் 1445/ 24.10.23 | ஹதீஸ் எண்: 69

-------------------------------------------------------------------------------------------------

1. இந்த ஹதீஸ் ஸஹீஹுல் புகாரி, திர்மிதி, பைஹக்கி, மற்றும் அஹமது போன்ற நூற்களில் பதிவு செய்யப்பட்டுள்ளது.

2. நபி மொழியின் தமிழ் மொழி பெயர்ப்பு:

நுஃமான் இப்னு பஷீர் (ரலியல்லாஹு அன்ஹு) அவர்கள் அறிவிக்கின்றார்கள் ;

அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் கூறினார்கள்:

அல்லாஹ்வின் (சட்ட திட்ட) வரம்புகளுக்குக் கட்டுப்பட்டு வாழ்பவர்ளுக்கும் அவற்றை மீறி நடப்பவர்களுக்குமான உதாரணம் என்பது - ஒரு சமூகத்தாரைப் போன்றதாகும். அவர்கள் கப்பலில் (தங்களுக்கு இடம் பிடிப்பதற்காகச்) சீட்டுக் குலுக்கிப் போட்டார்கள். (அதன்படி) அவர்களில் சிலருக்குக் கப்பலின் மேல் தளத்திலும் சிலருக்குக் கீழ்த் தளத்திலும் இடம் கிடைத்தது. கீழ்த் தளத்தில் இருந்தவர்களுக்குத் தண்ணீர் தேவைப்பட்டபோது (அதைக் கொண்டு வர) அவர்கள் மேல் தளத்தில் இருப்பவர்களைக் கடந்து செல்ல வேண்டியிருந்தது. (அதனால் மேலே இருந்தவர்களுக்குச் சிரமம் ஏற்பட்டது). அப்போது, கீழ்த் தளத்தில் இருந்தவர்கள் '"நாம் (தண்ணீருக்காக) நம்முடைய கீழ்த் தளத்தில் ஓட்டையிட்டுக் கொள்வோம்; நமக்கு மேலே இருப்பவர்களைத் தொந்தரவு செய்யாமலிருப்போம்'"என்று (தமக்குள்) பேசிக் கொண்டார்கள்.

அவர்கள் விரும்பியபடி செய்து கொள்ள அவர்களை மேல் தளத்தில் உள்ளவர்கள்விட்டுவிட்டால் (கப்பலில் இருப்பவர்கள்) அனைவரும் அழிந்து போவார்கள். (ஓட்டையிட விடாமல்) அவர்களின் கரத்தைப் பிடித்து (தடுத்துக்) கொள்வார்களாயேனால் அவர்களும் தப்பிப் பிழைத்துக் கொள்வார்கள். (அவர்களுடன் மற்ற) அனைவரும் தப்பிப் பிழைத்துக் கொள்வார்கள். ஸஹீஹ் புகாரி : 2493.

3. அஷ் ஷெய்க் அஸ்-ஸைலானி ஹஃபிழஹுல்லாஹ்:

இந்த ஹதீஸின் அர்த்தம் என்னவென்றால் நாம் ஒரு கெட்டதை கண்டு அதை தடுக்கவில்லை என்றால், நாமும் அதில் மூழ்கவோ பாதிப்படையவோ நேரும். மேலும் முழு சமூகமும் பாதிக்கப்படும். கல்வியும் பொறுப்பும் சுமந்த மக்கள் அனைவரும் அவர்களுடைய தகுதிக்கு ஏற்ப கெடுதிகளை தடுத்து அதனுடைய தீங்குகளைப் பற்றி மக்களுக்கு எச்சரிக்க வேண்டும். மாறாக நாம் நேரான பாதையில் இருக்கிறோம் என்று போதுமாக்கி கொண்டால் இந்த தீமைகளை தடுக்காமல் விட்டுவிட்டதன் காரணமாக நம் அனைவரையும் அது அழித்து விடும். ஹதீஸில் வந்தது போல் கப்பலில் ஓட்டை போடுபவனை நிறுத்தவில்லை என்றால் அனைவரும் மூழ்கிவிட நேரும்.

4. வேறு வார்த்தைகளை கொண்ட அறிவிப்புகளையும், இந்த ஹதீஸுக்கு ஒப்பான அர்த்தங்களை கொடுக்கக்கூடிய பலவீனமான அறிவித்தல்களைப் பற்றியும் இந்த அமர்வில் பார்க்கப்பட்டது.

இமாம் அல்பானி ரஹிமஹுல்லாஹ்: இந்த ஹதீஸிலிருந்து சுருக்கமான படிப்பினை:

நாம் மூன்று வகையாக மக்களை பார்க்கிறோம்;

முதலாவது, அல்லாஹ்வுடைய சட்டதிட்டங்களையும் எல்லைகளையும் நிலைநாட்டி பின்பற்றுபவர்கள் மேலும் நன்மையை ஏவி தீமையை தடுக்கும் மக்கள்.

இரண்டாவது, நன்மையான காரியங்களிலும் தீமையான காரியங்களிலும் ஈடுபட்டு அல்லாஹ்வுடைய சட்டதிட்டங்களுக்குள் தங்களை அடக்கிக் கொள்வதில் அலட்சியம் காட்டும் மக்கள்.

மூன்றாவது, அவர்கள் முழுக்க அலட்சியமாகத் தான் இருப்பார்கள் எந்தவிதமான நன்மையை ஏவுதலும் தீமையை தடுத்தலும் அவர்களிடத்தில் இருக்காது.

6. அஷ் ஷேக் அஸ் ஸைலானி ஹஃபிழஹுல்லாஹ்:

நாம் அனைவருமே நம்முடைய கல்வி தகுதிக்கும் சக்திக்கும் ஏற்ப நன்மைகளை ஏவி தீமைகளை தடுக்க வேண்டும்.

7. அஷ் ஷேக் அஸ் ஸைலானி ஹஃபிழஹுல்லாஹ்:

முடிவுரையாக கூறினார்கள்: நாம் இந்த விஷயத்தில், நன்மையை ஏவி தீமையை தடுத்தல் என்பதில், நம்முடைய முயற்சிகள் பயனளிக்கவில்லை என்றாலும், நம்முடைய ஆலோசனைகளுக்கு பின்பும் நம்முடைய சகோதரர்களும் பிற மக்களும் தீமையான காரியங்களில் நீடிக்கிறார்கள் என்பதனால் நம்முடைய கடமை முடிந்து விட்டது என்று எண்ணிக் கொள்ள வேண்டாம். மேலும் அல்லாஹ் நம்மிடத்தில் இதைப் பற்றி கேள்வி எழுப்ப மாட்டான் என்று அர்த்தம் அல்ல. ஷைத்தான் தொடர்ச்சியாக வேலை செய்து கொண்டிருக்கிறான் என்பதை நினைவில் கொள்ளுங்கள் அதனால் நாம் நலவை செயல்படும் மக்களை ஆர்வமூட்டி அவர்களின் ஈமானை பலப்படுத்துவதற்கும் அவர்களை கெடுதிகளிலிருந்து தடுப்பதற்கான உதவிகளையும் ஒத்துழைப்புகளையும் அளிக்க வேண்டும்.

ஆதலால், கெடுதிகளை தடுத்தல் என்ற செயலை விட்டு விட்டால் இந்த சமூகத்தின் அங்கமாக இருக்கும் நம்மையும் அந்த வழிகேட்டினால் ஏற்படும் தீங்கும் நம்மை அழித்து விடும் என்று இந்த நபிமொழி நமக்கு எடுத்துக்காட்டுகிறது.

(அஷ்-ஷெய்க் அபு அப்துர் ரஹ்மான் யஹ்யா சில்மி அஸ் ஸைலானி ஹஃபிழஹுல்லாஹ் அவர்கள் நடத்திய ஸில்ஸிலத்துல் ஆஹாதீஸ் அஸ் ஸஹீஹா என்ற நூலில் இருந்து பயனுள்ள குறிப்புகள் - அமர்வு 30)

நூல்: ஸில்ஸிலத்துல் ஆஹாதீஸ் அஸ் ஸஹீஹா

ஆசிரியர்: இமாம் முஹம்மத் நாஸிருத்தின் அல்-அல்பானி (رَحِمَهُ ٱللَّٰهُ)