சத்தியத்திற்கு ஒத்துழைப்பு வழங்குவதன் அவசியம்

அஷ்-ஷெய்க் யஹ்யா ஸில்மி அஸ்-ஸைலானி ஹஃபிழஹுல்லாஹ்

(மூத்த உலமாக்களிடம் கல்வியைச் சிறப்பாக கற்று அதனை சரியான முறையில் மக்களிடம் கொண்டு சேர்த்தவர் என்று அறியப்பட்டவர், ஸுன்னாஹ்வை எழுச்சியூட்டுபவர் மற்றும் ஸலஃப் வழிமுறையை சவூதி அரேபியாவில் படித்து அங்கு வாழ்ந்தவர்)

அல்லாஹ் (سُبْحَٰنَهُۥ وَتَعَٰلَىٰ) காலத்தின் மீது சத்தியமிட்டு நிச்சயமாக மனிதர்கள் நஷ்டத்தில் இருக்கிறார்கள் என்று சூரத்துல் அஸ்ரில் கூறுகிறான். அதற்கு பிறகு நஷ்டத்தில் இருந்து அவர்கள் தங்களை பாதுகாத்துக் கொள்வதற்கு நான்கு நிபந்தனைகளை விதிவிலக்காக சுட்டிக்காட்டி இருக்கிறான். அந்த நிபந்தனைகளில் இறுதியானது சத்தியத்தை நிலை நாட்டுவதற்கு ஒருவருக்கு ஒருவர் ஆதரவாக இருக்க வேண்டும் என்பது ஆகும்.

وَتَوَاصَوْا بِالْحَقِّ

சத்தியத்தை ஒருவருக்கொருவர் உபதேசம் செய்தவர்களை தவிர

(ஸூரத்துல் அஸ்ர்:3)

تَوَاصَوْا என்பது சத்தியத்தை நானும் செயல்பட்டு அதற்குப்பின் மற்ற மக்களுக்கு அதனை செயல்படுவதற்கும், (சத்தியக் குரலை) பரவலாக்குவதற்கும் ஆதரவாக இருப்பதாகும். மனிதர்கள் அல்லாஹ்வையும், நபி (صَلَّى اللّٰهُ عَلَيْهِ وَسَلَّمَ) அவர்களையும், இஸ்லாமிய மார்க்கத்தை அதன் ஆதாரத்துடன் ஈமான் கொண்டபின், ஸாலிஹான நல்லறங்கள் செய்வதினால் மட்டும் நஷ்டத்தில் இருந்து தப்பியவர்களாக ஆகமாட்டார்கள். மாறாக சத்தியத்தை விளங்கி, செயல்பட்டு, மேலும் அனைத்து முஸ்லிம்களும் இந்த சத்தியத்தை விளங்கி பின்பற்றுவதற்காக எந்தெந்த வழிகளில் ஒத்துழைப்பு வழங்க முடியுமோ அந்த வழிகளில் எல்லாம் தன்னுடைய ஒத்துழைப்பை வழங்க வேண்டும். இதுதான் சத்தியத்திற்கு ஒத்துழைப்பதாகும்.

அப்பொழுதுதான் நாம் நஷ்டத்திலிருந்து தப்ப முடியும் என்பதை அல்லாஹ் இந்த சூராவில் தெள்ளத்தெளிவாக எடுத்துக் காட்டிவிட்டான்.

சகோதரர்களே! சத்தியத்திற்கு ஒத்துழைக்க வேண்டுமென்றால் அதை நாம் முதலில் அடையாளம் கண்டுகொள்ள வேண்டும். அவ்வாறு அடையாளம் காண்பது அல்குர்ஆன் அஸ் சுன்னாஹ்வின் மூலமாகவா? அல்லது நம்முடைய புத்தியாலும் தர்க்கத்தாலும் விளங்கிய விளக்கத்தின் மூலமாகவா? என்பதை நாம் முதலில் முடிவு செய்ய வேண்டும். அதன் பிறகு தான் சத்தியத்திற்கான ஒத்துழைப்பு என்பது சாத்தியமாகும்.

மனிதர்கள் எந்த அளவிற்கு சத்தியத்தை சத்தியமென்று விளங்குவார்களோ, அந்த அளவிற்கு அவர்கள் சத்தியத்திற்கு ஆதரவாக இருப்பார்கள். எந்த அளவிற்கு சத்தியத்தை சத்தியம் என்று விளங்காமல் இருப்பார்களோ அதற்கு ஆதரவாக இருப்பது அவர்களுக்கு கடினமாகிவிடும். ஏனென்றால் ஒருவர் சத்தியத்தை விளங்காமல் அதற்கு தன்னை ஆதரவாக்கி கொள்வது தண்ணீரில் உப்பு கலந்திருப்பது எவ்வாறு தெரியாதோ அது போன்று (பலவீனமான ஒத்துழைப்பாக) ஆகிவிடும். எனவே சத்தியத்தை அடையாளம் காண்பது அல்குர்ஆன், அஸ்ஸுன்னாஹ்வின் மூலமாகத் தான் என்பதை நாம் உறுதியாக முடிவு செய்ய வேண்டும்.

அல்லாஹ்வும் அவனுடைய தூதரும் கூறியவற்றை நாம் உறுதியாக பற்றிப் பிடித்துக்கொள்ள வேண்டும். இவ்வாறு முடிவு செய்யும் பொழுது, மனித ஜின் வர்க்கத்தின் நிரந்தர எதிரியான ஷைத்தான் அவர்களை வழிகெடுப்பதற்காக முழு வீரியத்தோடு செயல்படுவதற்குத் தயார் ஆகிவிடுகின்றான். இதற்காகவே இஸ்லாமிய மார்க்கம் கல்வி கற்பதை நம் மீது கடமையாக்கி இருக்கிறது.

நபி (صَلَّى اللّٰهُ عَلَيْهِ وَسَلَّمَ) கூறினார்கள் :

طلب العلم فريضة على كل مسلم

கல்வியைத் தேடுவது ஒவ்வொரு முஸ்லிம்களின் மீதும் கடமையாகும்.

(சுனன் இப்னுமாஜா)

அல்லாஹ் (سُبْحَٰنَهُۥ وَتَعَٰلَىٰ) நபி (صَلَّى اللّٰهُ عَلَيْهِ وَسَلَّمَ) அவர்களுக்கு இந்த வஹியை கொடுப்பதற்கு முன்பாக அவரை நோக்கி கூறுகினான்:

اقْرَأْ بِاسْمِ رَبِّكَ الَّذِي خَلَقَ

உன்னை படைத்த இரட்சகனுடைய பெயரால் ஓதுவீராக

(ஸூரத்துல் அலஃக்:1)

ஆகவே ஓதுதல் என்பது கல்விக்கு முதல் அடிப்படையாகும். இதன் அடிப்படையில் ஒரு மனிதன் செயல்படவில்லை என்றால் அவன் கல்வி கற்றவனாகவே கருதப்படமாட்டான்.

اقْرَأْ بِاسْمِ رَبِّكَ الَّذِي خَلَقَ

“உன்னை படைத்த இரட்சகனுடைய பெயரை கொண்டு ஓதுவீராக”

என்று கல்வியின் முக்கியத்துவத்தை அல்லாஹ் எடுத்துக்காட்டுகிறான்.

கல்வி கற்பதில் முதன்மையானது அல்லாஹ்வைப் பற்றி அறியும் கல்வியாகும். இந்தக் கல்வியின் மூலமாகத் தான் ஒரு மனிதன் தன்னை படைத்த இரட்சகனை அறிந்து கொள்ள முடியும். மேலும் இதன் மூலமாகத் தான் மனிதர்கள் சத்தியத்தை அடையாளம் கண்டு கொள்வார்கள் என்பதற்காவே இந்த கல்வியை நபி (صَلَّى اللّٰهُ عَلَيْهِ وَسَلَّمَ) அனைவரின் மீதும் கடமையாக்கினார்கள்.

இமாம் அல்-புஹாரி (رَحِمَهُ ٱللَّٰهُ) தன்னுடைய கிதாபான ஸஹீஹ் அல்- புஹாரியில் கிதாபுல் இல்ம் என்ற பாடத்திற்கு கீழ் கல்வியின் முக்கியத்துவத்தை எடுத்துக்காட்டியுள்ளார்கள்:

العلم قبل القول والعمل

சொல்வதற்கும், செயல்படுவதற்கும் முன்பாக கல்வியை பெற்றுக்கொள்வது

அல்லாஹ் (سُبْحَٰنَهُۥ وَتَعَٰلَىٰ) அல்-குர்ஆனில் கூறுகின்றான்:

فَاعْلَمْ أَنَّهُ لَا إِلَهَ إِلَّا اللَّهُ وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ

நீங்கள் அறிந்து கொள்ளுங்கள்! வணக்கத்திற்கு தகுதியானவன் அல்லாஹ்வைத் தவிர வேறு யாருமில்லை அதற்கு பின் உம்முடைய பாவத்திற்காகவும், விசுவாசம் கொண்ட ஆண்களுக்காகவும், பெண்களுக்காகவும் பாவமன்னிப்பு கோருவீராக!

(ஸூரத்து முஹம்மது:19)

மேற்கூறப்பட்ட ஆயத்தில் அல்லாஹ் 'பாவமன்னிப்பு கேட்பதற்கு முன் அல்லாஹ்வைத் தவிர வணக்கத்திற்கு தகுதியானவன் யாருமில்லை என்பதை அறிந்து கொள்ளுங்கள்' என்று கூறுகின்றான். பாவ மன்னிப்பு என்பது உள்ளத்தாலும் நாவாலும் செய்யக்கூடிய அமலாகும். அதற்கு முன்னால் வணக்கத்திற்கு தகுதியானவன் அல்லாஹ்வைத் தவிர வேறு யாருமில்லை என்பதை அறிந்து கொள்ளுங்கள் என்று கட்டளையிட்டு கல்வியின் அவசியத்தை நமக்கு எடுத்துக் காட்டுகின்றான்.

மனிதர்கள் சத்தியத்திற்கு ஆதரவாக இருப்பதற்கு முதலில் அந்தசத்தியத்தை செயல்பட வேண்டும். பின்னர் அதனை மக்களிடத்தில் பரப்புவதற்கு அவனுடைய வார்த்தைகளால் ஆதரவாக இருக்க வேண்டும். இந்த இரண்டிற்கு முன்பு கல்வி அவசியம் என்பதை நாம் விளங்கிக் கொள்ள வேண்டும். அல்- இல்ம் என்பது அல்-குர்ஆன் அஸ்-ஸுன்னாஹ் (ஸஹீஹான கல்வி) ஆகும்.

அல்லாஹ் (سُبْحَٰنَهُۥ وَتَعَٰلَىٰ) அல்-குர்ஆனில் கூறுகின்றான்:

وَعَلَّمَ آدَمَ الْأَسْمَاءَ كُلَّهَا

அனைத்து பெயர்களையும் ஆதமிற்கு அல்லாஹ் கற்றுக் கொடுத்தான்

(ஸூரத்துல் பகரா: 31)

அல்லாஹ் (سُبْحَٰنَهُۥ وَتَعَٰلَىٰ) ஒவ்வொரு காலத்திலும் வஹியை இறக்கி மனிதர்களுக்கு வழி காட்டினான். இவ்வாறு வஹி மூலமாக இறக்கப்பட்டது தான் (அல்-இல்ம்) கல்வியாகும். இந்த கல்வியில் மனிதர்கள் வளர்ந்து வரும் பொழுது தான் சத்தியத்தை அடையாளம் கண்டு கொள்வார்கள். இந்த கல்வியை விட்டு தூரமாகும் பொழுது புத்தியின் அடிப்படையிலும், வாத தர்க்கத்தின் அடிப்படையிலும் தான் அனைத்து விஷயங்களையும் காணுவார்கள். இதனால் அவர்கள் சத்தியத்தை அடையாளம் கண்டு கொள்ளமாட்டார்கள்.

அல்லாஹ் (سُبْحَٰنَهُۥ وَتَعَٰلَىٰ) அல்-குர்ஆனில் கூறுகின்றான்:

وَقُلْ جَآءَ الْحَـقُّ وَزَهَقَ الْبَاطِلُ‌ؕ اِنَّ الْبَاطِلَ كَانَ زَهُوْقًا‏

சத்தியம் வந்துவிட்டது அசத்தியம் அழிந்துவிட்டது நிச்சயமாக அசத்தியம் அழிந்தே தீரும். (17:81)

(ஸூரத்துல் இஸ்ரா: 81)

அல்லாஹ் சத்தியத்தை பற்றி கூறும் பொழுது சத்தியம் வந்துவிட்டது (வஹி - குர்ஆன் மற்றும் ஸுன்னாஹ் இறக்கப்பட்டுவிட்டது) என்று கூறுகிறானே தவிர அதனை உங்கள் மனோஇச்சையின் படி தேடுமாறு கூறவில்லை. இந்த சத்தியத்திற்குதான்ஆதரவாக இருக்க வேண்டும் என்று அல்லாஹ் கூறுகிறான்.

அல்லாஹ் (سُبْحَٰنَهُۥ وَتَعَٰلَىٰ) அல்-குர்ஆனில் கூறுகின்றான்:

الْحَقُّ مِن رَّبِّكَ

சத்தியம் என்பது உன்னுடைய இரட்சகனிடம் இருந்து வந்ததாகும்(3:60)

(ஸூரத்துல் ஆல இம்ரான்: 60)

எனவே சத்தியம் என்பது வஹி மட்டுமே ஆகும். வஹி என்பது அல்- குர்ஆன் அஸ்-ஸுன்னாஹ் என்பதாகும். சத்தியத்தை அல்லாஹ் இறக்கிய வஹி மூலமாக மக்கள் அடையாளம் காணாததால் தான் கூட்டங்களும், இயக்கங்களும் பல உருவாகின. அவர்கள் ஷிர்க்கையும், குஃப்ரயும், பித்அத்தையும் சத்தியமாக்கி விட்டார்கள்.

சுத்தமான அடியார்கள் வஹி மூலமாக சத்தியத்தை அடையாளம் கண்டுவிட்டால், தங்களிடம் ஆழமான கல்வி இல்லாவிட்டாலும், செவிமடுத்தோம், கட்டுப்பட்டோம் என்று மனப்பூர்வமாக சத்தியத்தை ஏற்றுக்கொள்வார்கள்.

இதனைத் தான் அல்லாஹ் (سُبْحَٰنَهُۥ وَتَعَٰلَىٰ) அல்-குர்ஆனில் முஃமீன்களின் பண்பாக எடுத்துக் காட்டுகிறான்.

وَقَالُوا سَمِعْنَا وَأَطَعْنَا

(இரட்சகனே! உன் வேத வசனங்களை) செவியுற்றோம், இன்னும் (உன் கட்டளைக்கு] நாங்கள் கீழ்படிந்தோம் என்றும் கூறுகின்றார்கள்.

(ஸூரத்துல் பகரா: 285)

இவ்வாறு நாம் அல் குர்ஆனையும் அஸ்-ஸுன்னாவையும் பெற்றுக் கொள்ளும் பொழுது சத்தியத்தை அடையாளம் கண்டு கொள்வோம்.

மனிதர்கள் சத்தியத்தை அடையாளம் கண்டால் தான் அதனை செயல்பட முடியும். அதற்கு ஆதரவாக இருக்க முடியும். இதன் காரணமாகவே அல்லாஹ்வும் அவன் தூதரும் கல்வி கற்பதை நம் மீது கடமையாக்கி இருக்கிறார்கள்.

சகோதரர்களே! சூரா அல் அஸ்ரில் "யார் ஈமான் கொண்டு, ஸாலிஹான அமல்களை செய்து, சத்தியத்தை செயல்பட்டு அதை ஒருவருக்கு ஒருவரு ஏவி, அதற்கு ஆதரவாக இருந்து, பொறுமைக்கும் ஆதரவாக இருப்பார்களோ” அவர்கள் தான் நஷ்ட்த்தில் இருந்து தப்பியவர்கள் என்று அல்லாஹ் (سُبْحَٰنَهُۥ وَتَعَٰلَىٰ) காலத்தின் மீது சத்தியமிட்டு கூறுகிறான்.

ஈமான் என்பது அல் இல்ம் ஆகும். அல்-இல்ம் என்பது அல்லாஹ்வைப் பற்றிய கல்வி, அவனுடைய தூதரைப் பற்றிய கல்வி, அல்லாஹ் வழங்கிய ஒட்டுமொத்த ஷரியத் பற்றிய கல்வி ஆகும். யார் இந்தக் கல்வியை கற்பதில் குறை வைப்பார்களோ அவர்கள் நஷ்டத்தில் இருப்பார்கள் என்பதை அல்லாஹ் எடுத்துக்காட்டுகிறான்.

சத்தியத்தை செயல்படுவதும் சத்தியத்திற்கு ஆதரவாக இருப்பதும் இரு வேறுபாடான விஷயங்களாகும்.

சத்தியத்தை செயல்படுவது என்றால் நம்மை சீர்படுத்தி, நம்முடைய குடும்பத்தையும் சீர்படுத்தி, நாம் நல்லவர்களாக வாழ்வதற்கு முயற்சி செய்வதாகும்.
சத்தியத்திற்கு ஆதரவு என்பது நம்மைப் போன்று மற்ற மக்களும் சத்தியத்தை விளங்கி பின்பற்ற வேண்டும் என்று அதனை சமூகத்தில் பரவலாக்க அனைத்து முயற்சிகளையும், செயல்களையும் மேற் கொள்வதாகும்.

எனவே, மனிதர்களாகிய நாம் முதலில் அல்-இல்மை பெற்றவர்களாக இருக்க வேண்டும். அல்-இல்மை ஸலஃபுஸ் ஸாலிஹீன்களின் வழிமுறையில் பெற்றுக் கொள்ளும் பொழுது, சத்தியத்தை அடையாளம் காண்போம். அல்லாஹ் நமக்கு பாக்கியமளித்த இந்த சத்தியத்தை நாமும் செயல்பட்டு, மற்றவர்கள் செயல்படுவதற்கு ஒத்துழைப்பு செய்யும் பொழுது இம்மையிலும், மறுமையிலும் நஷ்டத்திலிருந்து தப்புவோம்.

اللَّهُمَّ أرني الْحَقَّ حَقَّاً وَارْزُقْنِي اتَّبَاعَهُ، وَأَرِنِي الْبَاطِلَ بَاطِلاً وَارْزُقْنِي اجْتَنَابَهُ

"அல்லாஹ்வே! எங்களுக்கு சத்தியத்தை சத்தியமாக காட்டித் தந்து அதனை பின்பற்றுவதற்கு பாக்கியம் உள்ளவர்களாக ஆக்குவாயாக. அசத்தியத்தை அசத்தியமாக காட்டித் தந்து அதிலிருந்து தவிர்ந்து கொள்வதற்கு பாக்கியம் உள்ளவர்களாக ஆக்குவாயாக".

cooperating with truth

சத்தியத்திற்கு ஒத்துழைப்பு வழங்குவதன் அவசியம்