அல்லாஹ்வின் உரிமைக்கு எதிராக போராடாதீர்கள்!

மக்களின் ஆதரவுக்காக முஸ்லிம் அரசியல் கூட்டங்கள், மத்ஹபு ஜமாஅத்துகள், தவ்ஹீத் கூட்டங்கள், குர்ஆன் ஹதீஸ் என்ற பெயரில் அமைந்திருக்கும் கூட்டங்கள் ஆகிய அனைவரும் அல்லாஹ்வின் உரிமையை பாதுகாக்க மறந்து விட்டார்கள், நபி ஸல்லல்லாஹு அலைஹி வஸல்லம் அவர்களின் உரிமையை காக்க மறந்து விட்டார்கள். முதலாவதாக, ஸலஃபுஸ் ஸாலிஹீன்களின் வழிமுறையை பின்பற்றும் எங்களுக்கும், இந்த இயக்க வாதிகளுக்கும் நினைவுபடுத்திக் கொள்வது, "அல்லாஹ்வை அஞ்சிக் கொள்ளுங்கள்". அல்லாஹ்வுடைய உரிமை என்ன என்பதை நபி மொழிகள் உங்களுக்கு எடுத்துக்காட்டவில்லையா?

فَإِنَّ حَقَّ اللَّهِ عَلَى الْعِبَادِ أَنْ يَعْبُدُوهُ وَلاَ يُشْرِكُوا بِهِ شَيْئًا

முஆது இப்னு ஜபல் (رضي الله عنه) அறிவித்தார்கள் அல்லாஹ்வின் தூதர்

(صلى الله عليه وسلم) கூறினார்கள்:

“அடிமைகள் மீது அல்லாஹ்வுடைய உரிமை என்பது அல்லாஹுத்தஆலாவை எவ்வித இணை துணை கற்பிக்கப்படாமல் தனித்ததாக வணங்கப்பட வேண்டும் என்பதாகும்”.

(ஸஹீஹ் அல் புகாரீ – 2856)

அல்லாஹ் அவனுடைய பெயர்களிலும் பண்புகளிலும் செயல்களிலும் தனித்தவன் தூய்மையானவன் பரிபூரணமானவன் அவனுக்கு இணை எதுவும் இல்லை. அதேபோல் அல்லாஹ்வுடைய படைப்புகளாகிய நாம் அவனுக்கு மட்டுமே வணக்கம் என்ற செயலை தனித்ததாக ஆக்க வேண்டும், அவனிடம் மட்டுமே உதவி தேட வேண்டும் அவனை மட்டுமே புகழ வேண்டும், வாழ்க்கையின் அனைத்து விஷயங்களிலும் அவனுக்கு கீழ்படிந்தவர்களாக வாழ வேண்டும்.

வணக்கத்திற்கு தகுதியானவன் அல்லாஹ்வைத் தவிர வேறு எதுவும் இல்லை என்ற இந்த ஷஹாதத்தின் விஷயத்தில் நாம் குறை செய்தால் நம் நாட்டு மக்கள் அனைவரும் அல்லாஹ்வினுடைய தண்டனையையும் கோபத்தையும் எதிர்கொள்ள நேரிடும். அல்லாஹ் நம்மை அதிலிருந்து பாதுகாப்பானாக.

தர்காவில் வழிபாடு போன்ற ஷிர்க் எனும் இணைகற்பித்தலில் ஈடுபடுவது முஸ்லிம்களின் உரிமை என்று பகிரங்கமாக ஆதரவு காட்டி போராடுவது மிகவும் மோசமான, வழிகேடான, முஸ்ல்மிகளை ஏமாற்றும் செயலாகும். குர்ஆனை படித்தவர்கள் நபிமொழிகளை தெரிந்தவர்கள், சமூகத்தை வழிநடத்தும் தலைவர்கள், மௌலவிமார்கள், ஆகியோரே இவ்வாறு நடந்து கொள்ளும் பொழுது முஸ்லிம் பொதுமக்களின் நிலை என்ன?

அல்லாஹ்வின் உரிமையில் குறை வைப்பவர்கள் ஒரு நாளும் இவ்வுலகிலோ அல்லது மறுமையிலோ வெற்றியை அடைய முடியாது. அல்லாஹ் நமக்கு இறக்கித் தந்த சட்டத்தை மீறி, அல்லாஹ்வுடைய எல்லையை மீறி, ஒரு முஸ்லிம், மக்களின் அபிமானத்திற்காகவும் சமூக நீதியை பேணுவதாக எண்ணிக்கொண்டு தர்காக்களுக்கு சார்பாக பேசுவது அறியாமையையும் நயவஞ்சகத்தனத்தையும் தான் வெளிப்படுத்துகிறது. இவ்வுலகில் சமுதாயத்தின் பாதுகாப்பிற்காகவும் முன்னேற்றத்திற்காகவும் மனிதர்களால் உருவாக்கப்பட்ட சட்ட திட்டங்களும் நீதிகளும் மாற்றத்திற்கும் குறைகளுக்கும் உட்பட்டதே. இதை நாம் அனைவரும் வரலாறு நெடுக இன்று வரை கண்டு கொண்டுதான் இருக்கின்றோம். ஆனால் குர்ஆனையும் நபிமொழியையும் படித்த ஒரு முஸ்லிம் அல்லது முஸ்லிம் சமூக தலைவர்கள், அல்லாஹ்வுக்கு அடிபணிவது தான் மனித குலத்திற்கு நலவை பெற்றுத் தரும், அதை நோக்கி அழைப்பவன் தான் சிறந்த பொதுநலவாதி என்பதை அறியாமல் செயல்படுகிறார்கள். இவர்கள் இதனை அறிந்தும் செயல்பட மறுப்பவர்களாகவும் இருக்க முடியும். அல்லாஹ் குர்ஆனில் கற்றுத் தந்த நீதியை விட அவனுடைய படைப்புகளாகிய மனித சமூகம் ஒரு சிறந்த நீதியை ஒருவருக்கொருவர் உபதேசித்து விட முடியுமா? நிச்சயமாக இல்லை.

இவ்வாறான இஸ்லாமிய மார்க்க கொள்கை அடிப்படைகளை நம்பி செயல்படுபவன் தான் முஸ்லிமாவான். ஒரு முஸ்லிம் பொதுமகனோ அல்லது சமூகத்தின் தலைவரோ தன்னுடைய மார்க்க கொள்கைகளுக்கு துரோகம் செய்வது, அவரது உண்மைத் தன்மையை தான் குறைபடுத்துகிறது. தனக்கே உண்மையாக இல்லாத மனிதன் மக்களுக்கு எவ்வாறு வழி காட்ட முடியும்? தங்களால் நேர்வழியையும் வழிகேட்டையும் பிரித்து அறிய முடியாத ஜமாஅத்துகள் மக்களுக்கு எவ்வாறு நேர்வழியை காட்ட முடியும்? இவ்வாறு அறியாமைத் தன்மையோடும் நயவஞ்சக தன்மையோடும் செயல்படுவது நம்மை அல்லாஹ்விற்கு முன்பு நஷ்டவாளியாகத்தான் ஆக்கிவிடும்.

இவ்வாறு கல்வி இல்லாமல் செயல்படும் தலைவர்கள் மற்றும் அழைப்பாளர்களுக்கு ஸலஃபி உலமாக்கள் அளித்த சில உபதேசங்களை சிறு குறிப்புகளாக கீழே காணலாம்:

1. அரசியலை விட்டு விலகி இருப்பதே சிறந்த அரசியல் ஏனென்றால் இன்றைய அரசியலுக்குள் புகுந்தால் நமக்கு குழப்பம் தான் மிஞ்சும். – அஷ்-ஷெய்க் அல்-அலபானி (رحمه الله)

முஸ்லிம் தலைவர்களும் அழைப்பாளர்களும் மக்களின் ஆதரவை பெறுவதற்காக அல்லாஹ் மற்றும் நபியின் உரிமையில் குறை செய்கிறார்கள்.

2. நவீன கால அரசியலில் தன்னை ஈடுபடுத்திக் கொள்பவன் அழைப்புப் பணியை (குர்ஆன் மற்றும் நபி மொழியை நோக்கி மக்களை அழைப்பதை) பாழாக்கி விடுவான். – அஷ்-ஷெய்க் முக்பில் பின் ஹாதி (رحمه الله)

3. இயக்கவாதம் என்பது நம்மை நரகத்திற்கு தான் இட்டுச்செல்லும். – அஷ்-ஷெய்க் முக்பில் பின் ஹாதி (رحمه الله)

4. இஸ்லாம் ஆட்சி அதிகாரங்களை பாதுகாக்கவோ, அரசியல் மேலாதிக்கம் செலுத்தவோ வரவில்லை. மாறாக, அல்லாஹ்வை எவ்வித இணை துணை இல்லாமல் தனித்ததாக வணங்க வேண்டும் என்ற அல்லாஹ் வின் உரிமையை நிலைநாட்டும் ஒரே குறிக்கோளுடன் இறக்கப்பட்ட மார்க்கமாகும். மனித சமூகம் தன்னை படைத்த உண்மையான ரப்புக்கு கீழ்படியுமாறு அழைக்க வந்த மார்க்கம் தான் இந்த இஸ்லாம். – அஷ்-ஷெய்க் யஹ்யா ஸில்மி (حفظه الله)

5. இஹ்வானுல் முஸ்லிமீன் என்பவர்களால் கால்பந்து மற்றும் கைப்பந்து தான் விளையாட முடியும். அவர்களால் சமூகத்திற்கு எந்த ஒரு முன்னேற்றமும் பிரயோஜனமும் கிடையாது என்ற கருத்தை இமாம் அல்பானி தெரிவித்தார்கள்.

இஸ்லாமிய நம்பிக்கைகளில் குழப்பம் செய்து சமரசம் செய்து சமூகத்தை ஒன்றுபடுத்துகிறோம் என்ற பெயரில் மக்களை ஏமாற்றி அரசியல் செய்யும் இந்த தீவிரமான எகிப்து நாட்டில் ஆரம்பிக்கப்பட்ட இந்த ஜமாஅத்தின் வழிமுறையில் இன்று பல அமைப்புகள் தமிழ்நாட்டிலும் செயல்படுகிறது.

ஒவ்வொரு இஸ்லாமிய அமைப்பும் தங்களை நேர் வழியில் இருப்பவர்களாக கருதினாலும், அனைத்து இயக்கவாதிகளும் சமூக பாதுகாப்பு மற்றும் ஒற்றுமை என்ற பெயரில் குர்ஆனையும் நபி மொழிகளையும் புறம் தள்ளி கொள்கை சமரசம் செய்து கொண்டு, ஒருவருக்கொருவர் ஒத்துழைப்பு அளித்து, மேடைகளை பகிர்ந்து கொள்வதை நாம் அனைவரும் காண முடியும். இவர்களின் இந்த முயற்சிகள் அனைத்தும் வீணானவைகளே. இது நமக்கு அல்லாஹ்வின் பாதுகாப்பை பெற்றுத் தராது, சமூக முன்னேற்றத்திற்கும் ஒற்றுமைக்கும் வழி வகுக்காது.

யாரெல்லாம் தீமைகளைக் கண்டு பேசாமல் மௌனமாக இருக்கிறார்களோ அவர்கள் அனைவரும் மௌனமாக இருக்கும் ஷைத்தான்கள் என்று அஷ் ஷெய்க் ஸாலிஹ் அல் ஃபவ்ஸான் அவர்கள் கூறினார்கள்.

எனவே தர்காக்களுக்கு சார்பாக ஆர்ப்பாட்டம் செய்வது, அது முஸ்லிம்களின் உரிமை என்று குரல் கொடுப்பது நிச்சயமாக அல்லாஹ்வின் உரிமையை இழிவுபடுத்துவதாகும். அல்லாஹ்விற்கு இணையாக வழிபடப்படும் தர்காக்களை மீட்பதற்கு போராடுபவர்கள் அல்லது அதன் மேல் முஸ்லிம்களுக்கு உரிமை உள்ளது என்று கூறுபவர்கள் உண்மையில் அல்லாஹ்விற்கு இணை கற்பிக்கும் செயலுக்கு ஆதரவளிப்பவர்கள் ஆவர்.

இஸ்லாமிய இயக்கங்களின் வழிகேடான கருத்துக்களில் சிக்கி இருக்கும் முஸ்லிம் பொதுமக்கள் இதனை உணர்ந்து தர்காக்களுக்கு ஆதரவளிப்பதிலிருந்து ஒதுங்கி, அதன் அரசியல்களை விட்டு விலகி இருப்பது தான் அவர்களை இம்மையில் இணைகற்பித்தல் என்ற பெரும் பாவத்தை விட்டும் நாளை நரக நெருப்பின் வேதனையை விட்டும் பாதுகாக்கும். இந்த தவ்ஹீதை பிரச்சாரம் செய்வது தான் அனைத்து இஸ்லாமிய அழைப்பாளர்களுக்கும் கடமையாகும்.

மேலும் தமிழ்நாட்டில் தவ்ஹீத் பிரச்சாரம், குர்ஆன் ஹதீஸின் பக்கம் அழைப்பு என்று கூறும் ஜமாஅத்துகளை நம்பி முஸ்லிம்கள் ஏமாந்து விட வேண்டாம். ஏனென்றால் இவர்கள் ஒருபுறம் ஷிர்க் பற்றி விழிப்புணர்வு என்று பயான் செய்துவிட்டு மறுபுறம் எவ்வித கொள்கை பிடிப்பும் இல்லாமல் முஸ்லிம் அரசியல் கூட்டங்களுடன் சேர்ந்து கொள்கிறார்கள். இதில் கல்வி படித்த சில மதனிமார்களும் உள்ளடங்குவார்கள். இதைத்தான் உலமாக்கள் கொள்கையில் மற்றும் அழைப்பு பணியில் ஏற்படும் நயவஞ்சகத்தனம் என்று கூறுவார்கள். நம்முடைய இந்த பதிவுக்கான நோக்கம், ஒவ்வொரு முஸ்லிமின் ஈமானும் இஸ்லாமும் அல்லாஹ் ஏற்றுக் கொள்வதற்கு தகுதியானவையாக பாதுகாப்பானதாக அமைய வேண்டும் என்பதுதான். அல்லாஹ் சுபஹானஹு வதஆலா நம் அனைவரையும் நேர்வழியிலேயே வாழ்ந்து சரியான ஈமானோடும் இஸ்லாத்தோடும் மரணிக்க செய்வானாக.

அஷ்-ஷெய்க் யஹ்யா ஸில்மி (حفظه الله) அவர்களின் வழிகாட்டுதலில் வெளியிடப்படுகிறது.

Darga

அல்லாஹ்வின் உரிமைக்கு எதிராக போராடாதீர்கள்!