الحمدلله رب العالمين والصلاة والسلام على من لا نبي بعده أما بعد

அகில உலகத்தையும் அதில் இருக்கும் அனைத்தையும் படைத்து பரிபாலிக்க கூடியவன் ரப்புல் ஆலமீன் ஆகிய அல்லாஹ் சுபுஹானஹு வதஆலா தான். வணக்கத்திற்கு தகுதியானவன் அல்லாஹ் சுபுஹானஹு வதஆலா மட்டும் தான். அந்த ரப்புல் ஆலமீனுக்கு இருக்கும் பெயர்களும் பண்புகளும் எவ்வித குறை இல்லாத உயர்ந்த பண்புகள் ஆகும். அவை அனைத்தும் அவனுக்கு மட்டுமே உரியதாகும். அதில் பங்கு கொள்ள வேறு எவருக்கும் உரிமை இல்லை.

சிலைகள், அரசர்கள், முன்னோர்கள், மரங்கள் போன்றவற்றிற்கு வணக்கம் செலுத்துவதை விட்டும், ரப்புல் ஆலமீனுக்கு இணை கற்பிப்பதை விட்டும், பொய்யான தாகூத்துகளுக்கும், ஷைத்தான்களுக்கும் அடிமைப்பட்டு இருப்பதை விட்டும் நம்மை விடுதலை செய்து, படைத்தவனாகிய அல்லாஹ்வை மட்டும் தனித்ததாக வணங்குவதற்கு மக்களை அழைத்தவர் தான் எங்கள் தலைவர் நபி முஹம்மது ஸல்லல்லாஹு அலைஹி வஸல்லம்.

வணக்கத்திற்கு தகுதியானவன் அல்லாஹ்வை தவிர வேறு எதுவும் இல்லை என்றும் முஹம்மது ஸல்லல்லாஹு அலைஹி வஸல்லம் அவர்கள் அல்லாஹ்வின் தூதரும் அடிமையும் ஆவார்கள் என்று சத்தியமும் சாட்சியமும் அளித்து முஸ்லிம்களாக வாழும் மக்கள் அல்லாஹ்விற்கு செய்த சத்தியத்தை உடைத்து, அனைத்து நபிமார்கள் காட்டித் தந்த பாதையையும் விட்டுவிட்டு, சிலைகளை கையில் ஏந்துகிறார்கள்.

இவ்வாறான செயலில் ஈடுபடுபவர்கள் சத்தியவாதிகளா? அசத்தியவாதிகளா? இவர்கள் அனைவரும் தானும் ஏமாளிகளாக ஆகி சுற்றி இருப்பவர்களையும் ஏமாற்றுபவர்கள் ஆவர். அல்லாஹ்விற்கு அளித்த சத்தியத்தின்படி தங்களை நடத்திக் கொள்ள முடியாதவர்கள் எவ்வாறு முஸ்லிம்களிடத்திலும் மாற்று மதத்தவர்கள் இடத்திலும் நாட்டு மக்கள் அனைவரிடத்திலும் உண்மையாக நடந்து கொள்வார்கள். இந்த பொய்யர்களை அனைத்து சமுகங்கள் மற்றும் மதங்களை சார்ந்த மக்கள் அறிந்து தெளிவோடு நடந்து கொள்ள வேண்டும்.

அல்லாஹ் சுபுஹானஹு வதஆலா கூறுகின்றான்:

إِنَّ ٱلشِّرْكَ لَظُلْمٌ عَظِيمٌ [٣١:١٣]

நிச்சயமாக ஷிர்க் என்பது மிகப்பெரும் அநியாயம் (31:13)

ஐவேளை தொழுகையை நிறைவேற்றி, தொப்பியை அணிந்து கொண்டு சிலைகளை கையில் ஏந்தி கொண்டாடுவது மிகப்பெரிய அநியாயம் மட்டுமல்ல, மாறாக நயவஞ்சகத்தனமும் ஆகும். இந்த நயவஞ்சகர்களை முஸ்லிம்களோ முஸ்லிம் அல்லாதவர்களோ நம்பி ஏமாந்து விட வேண்டாம். இவர்கள் உண்மையான முஸ்லிம்கள் அல்ல. உண்மையான முஸ்லிம்கள் அல்லாஹ்விடத்தில் உண்மையாக நடந்து கொள்வார்கள், நபியின் பாதைக்கு உண்மையாக நடந்து கொள்வார்கள், ஆட்சி அதிகாரத்தில் உள்ளவர்களுக்கு உண்மையாக நடந்து கொள்வார்கள், மக்களிடத்தில் உண்மையாக நடந்து கொள்வார்கள், இஸ்லாமிய மார்க்கத்தில் உள்ள சத்திய கொள்கையையும் உயர்ந்த நல்ல பண்புகளையும் மக்களுக்கு எவ்வித நயவஞ்சகமும் இல்லாமல் எடுத்துக்காட்டுவார்கள், இந்த உண்மையான பண்புகளை கொண்ட முஸ்லிம்கள் மட்டும் தான் நம்முடைய சமூகத்திற்கும் நாட்டிற்கும் நலவையும் முன்னேற்றத்தையும் ஏற்படுத்துவார்கள்.

இவ்வாறான நயவஞ்சகர்கள் அனைத்து சமுதாயத்திலும் உள்ளார்கள். அவர்களிடத்தில் பொய் நிறைந்திருக்கும். இவ்வாறு அநியாயம் செய்யக் கூடியவர்கள், இருமுகம் கொண்ட ஷைத்தான்கள் ஆவர். இவ்வாறான அநியாயக்காரர்களை விட்டு நம் நாட்டில் உள்ள அனைவரையும் அல்லாஹ் பாதுகாத்து நேர்வழியான தூய இஸ்லாமிய மார்க்கத்தின் பக்கம் வழிகாட்டுவானாக. ஆமீன்!!

(அஷ்-ஷெய்க் யஹ்யா ஸில்மி ஹஃபிழஹுல்லாஹ் அவர்களின் மேற்பார்வையில் வெளியிடப்படுகிறது)

Nifaq

முஸ்லிம்கள் சிலைகளை சுமந்தால் சமூக இனக்கமும் முன்னேற்றமும் ஏற்படுமா?